ଅକ୍ଟୋବର ୮ ଓଡ଼ିଶା ବନ୍ଦକୁ ନେଇ କଳାହାଣ୍ଡିରେ ବିରୋଧୀ ଦଳଙ୍କ ସାମ୍ବାଦିକ ସମ୍ମିଳନୀ MMDR ଆଇନ ସଂଶୋଧନ, SIR ପ୍ରକ୍ରିୟା, ପାଠ୍ୟପୁସ୍ତକ ତ୍ରୁଟି ଓ ବନ୍ୟା କ୍ଷତିପୂରଣକୁ ନେଇ ଉଠିଲା ପ୍ରଶ୍ନ

କଳାହାଣ୍ଡି, ୩/୧୦ (ଷ୍ଟାରନିୟୁଜ ଓଡ଼ିଶା):
MMDR ଆଇନର ସଂଶୋଧନ, SIR ପ୍ରକ୍ରିୟା, ପ୍ରାଥମିକ ଶ୍ରେଣୀର ପାଠ୍ୟପୁସ୍ତକରେ ତ୍ରୁଟି, ଶିକ୍ଷକ ଅଭାବ ଏବଂ ଚଳିତ ବର୍ଷର ବନ୍ୟା ପରିଚାଳନା ଓ କ୍ଷତିପୂରଣକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ବିରୋଧୀ ଦଳଗୁଡ଼ିକ। ଏହି ସମସ୍ୟାଗୁଡ଼ିକୁ ନେଇ ଆସନ୍ତା ଅକ୍ଟୋବର ୮ ତାରିଖରେ ଓଡ଼ିଶା ବନ୍ଦ ପାଇଁ ଆହ୍ୱାନ ଦିଆଯାଇଥିବା ବେଳେ, ଏହାକୁ ସଫଳ କରିବା ନେଇ କଳାହାଣ୍ଡିରେ ବିଭିନ୍ନ ବିରୋଧୀ ଦଳ ପକ୍ଷରୁ ସାମ୍ବାଦିକ ସମ୍ମିଳନୀ ଆୟୋଜିତ ହୋଇଛି।
ସମ୍ମିଳନୀରେ ବିରୋଧୀ ଦଳର ନେତାମାନେ କହିଥିଲେ ଯେ, MMDR ଆଇନର ସଂଶୋଧନ ଦ୍ୱାରା ଓଡ଼ିଶାର ଖଣିଜ ସମ୍ପଦ ଓ ରାଜସ୍ୱ ଅଧିକାର ପ୍ରଭାବିତ ହେବାର ଆଶଙ୍କା ରହିଛି। ତେଣୁ ସଂଶୋଧିତ ଆଇନକୁ ପ୍ରତ୍ୟାହାର କରିବା ପାଇଁ ସେମାନେ ଦାବି ଉଠାଇଥିଲେ।
ସେହିପରି SIR ପ୍ରକ୍ରିୟାକୁ ନେଇ ମଧ୍ୟ ବିରୋଧୀ ଦଳଗୁଡ଼ିକ ପ୍ରଶ୍ନ ଉଠାଇଛନ୍ତି। ଭୋଟର ତାଲିକା ପ୍ରସ୍ତୁତି ପ୍ରକ୍ରିୟାରେ ସ୍ୱଚ୍ଛତା, ନିରପେକ୍ଷତା ଓ ଯୋଗ୍ୟ ଭୋଟରଙ୍କ ଅଧିକାର ସୁନିଶ୍ଚିତ କରିବାକୁ ସେମାନେ ଦାବି କରିଥିଲେ।
ଶିକ୍ଷା ବ୍ୟବସ୍ଥାକୁ ନେଇ ମଧ୍ୟ ସମ୍ମିଳନୀରେ ଅସନ୍ତୋଷ ପ୍ରକାଶ ପାଇଥିଲା। ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ୍ୟପୁସ୍ତକରେ ଥିବା କଥିତ ତ୍ରୁଟି, ବିଭିନ୍ନ ବିଦ୍ୟାଳୟରେ ଶିକ୍ଷକ ଅଭାବ ଏବଂ ଶିକ୍ଷା ବ୍ୟବସ୍ଥାର ଅନ୍ୟାନ୍ୟ ସମସ୍ୟାର ସମାଧାନ ପାଇଁ ଦାବି କରାଯାଇଥିଲା।
ଚଳିତ ବର୍ଷର ବନ୍ୟାରେ ପ୍ରଭାବିତ ପରିବାର ଓ ଚାଷୀମାନଙ୍କ ସମସ୍ୟା ମଧ୍ୟ ସମ୍ମିଳନୀର ମୁଖ୍ୟ ପ୍ରସଙ୍ଗ ଥିଲା। ବନ୍ୟା କ୍ଷୟକ୍ଷତିର ଉପଯୁକ୍ତ ଆକଳନ କରି ପ୍ରଭାବିତଙ୍କୁ କ୍ଷତିପୂରଣ, ଚାଷ ନଷ୍ଟର ଭରଣା ଏବଂ କୃଷି ଋଣ ଛାଡ଼ ଭଳି ପଦକ୍ଷେପ ନେବାକୁ ଦାବି ଉଠାଯାଇଥିଲା।
ଏହି ସମସ୍ତ ଦାବିକୁ ନେଇ ଅକ୍ଟୋବର ୮ ତାରିଖର ଓଡ଼ିଶା ବନ୍ଦକୁ ସଫଳ କରିବା ପାଇଁ ବିରୋଧୀ ଦଳଗୁଡ଼ିକ ଜନସାଧାରଣଙ୍କ ସହଯୋଗ ଲୋଡ଼ିଥିଲେ।
ସାମ୍ବାଦିକ ସମ୍ମିଳନୀରେ କଂଗ୍ରେସ ଜିଲ୍ଲା ସଭାପତି ଜଳନ୍ଧର ନାଏକ, କଳାହାଣ୍ଡି ଜିଲ୍ଲା ପ୍ରଭାରୀ ତଥା ପୂର୍ବତନ ବିଧାୟକ ଭୁଜବଳ ମାଝୀ, ବରିଷ୍ଠ କଂଗ୍ରେସ ନେତା ଧନୁର୍ଦ୍ଧର ଗହୀର, ଶ୍ରୀବତ୍ସ ପ୍ରଧାନ, ଇନ୍ଦ୍ରଜିତ ମହାକୁଡ଼, ସିଦ୍ଧାର୍ଥ ନାଏକ, ସୁକାନ୍ତି ସରାଫ, ସନ୍ତୋଷ ପ୍ରଧାନ ଓ ଲିଙ୍ଗରାଜ ନାଏକଙ୍କ ସମେତ କମ୍ୟୁନିଷ୍ଟ ନେତା ପୂର୍ଣ୍ଣଚନ୍ଦ୍ର ପ୍ରଧାନ, ସିପିଆଇ(ଏମ୍) ନେତା ସଞ୍ଜୟ ସୁନାନୀ ଏବଂ କଳାହାଣ୍ଡି ଜିଲ୍ଲା ସମାଜବାଦୀ ପାର୍ଟି ସଭାପତି ଜଗଦିଶ ଯାଦବ ପ୍ରମୁଖ ଉପସ୍ଥିତ ଥିଲେ।