କେସିଙ୍ଗାରେ ରାଜପଥ ଜବରଦଖଲକୁ ନେଇ ଟ୍ରାଫିକ ଚିନ୍ତା ଜାତୀୟ ରାଜପଥ କଡ଼ରେ କଥିତ ଅନଧିକୃତ ନିର୍ମାଣ; ମିଳିତ ଉଚ୍ଛେଦ ଓ ସୀମା ନିର୍ଦ୍ଧାରଣ ପାଇଁ ଦାବି

କେସିଙ୍ଗା,ତା.୩ l୧୦(ଷ୍ଟାରନ୍ୟୁଜ ଓଡ଼ିଶା): କେସିଙ୍ଗା ସହର ଦେଇ ଯାଇଥିବା ଜାତୀୟ ରାଜପଥ କଡ଼ରେ କଥିତ ଜବରଦଖଲ ଓ ଅନଧିକୃତ ନିର୍ମାଣକୁ ନେଇ ଏବେ ଟ୍ରାଫିକ ବ୍ୟବସ୍ଥା ଓ ଜନସୁରକ୍ଷା ପ୍ରଶ୍ନ ଉଠିଛି। ରାଜପଥର ଅଧିକାରଭୁକ୍ତ ଅଞ୍ଚଳରେ ଅସ୍ଥାୟୀ ଓ ଅର୍ଦ୍ଧସ୍ଥାୟୀ ଦୋକାନ ଏବଂ ବିଭିନ୍ନ ଗଠନ ନିର୍ମାଣ ହୋଇଥିବା ନେଇ ଜଣେ ସ୍ଥାନୀୟ ବାସିନ୍ଦା ଲିଖିତ ଅଭିଯୋଗ କରିଛନ୍ତି।
ଅଭିଯୋଗ ଅନୁଯାୟୀ, ରାଜପଥ ପାର୍ଶ୍ୱରେ ଏଭଳି ଗଠନ ବଢ଼ିବା ଫଳରେ ଯାନବାହନ ଚଳାଚଳ ପାଇଁ ଉପଲବ୍ଧ ସ୍ଥାନ ସଙ୍କୁଚିତ ହେଉଛି। ଫଳରେ ଯାତାୟାତରେ ବାଧା ସୃଷ୍ଟି ହେବା ସହ ଗାଡ଼ି ଚାଳକ, ପଥଚାରୀ ଓ ସ୍ଥାନୀୟ ବାସିନ୍ଦାଙ୍କ ପାଇଁ ସମସ୍ୟା ବଢ଼ୁଥିବା ଦର୍ଶାଯାଇଛି।
ଜାମ୍‌ରେ ଅସ୍ତବ୍ୟସ୍ତ ଯାତାୟାତ
କେସିଙ୍ଗାର ମୁଖ୍ୟ ରାଜପଥ ଅଞ୍ଚଳରେ ବିଶେଷକରି ବ୍ୟସ୍ତ ସମୟରେ ଯାନବାହନ ଚାପ ବଢ଼ୁଥିବା ବେଳେ ରାସ୍ତା ପାର୍ଶ୍ୱର ଅବରୋଧ ସମସ୍ୟାକୁ ଆହୁରି ଜଟିଳ କରୁଥିବା ଅଭିଯୋଗ ହୋଇଛି। ଏହାର ପ୍ରଭାବ କେବଳ ସ୍ଥାନୀୟ ଯାତାୟାତ ନୁହେଁ, ଦୂରପାଳୀ ଯାନବାହନ ଚଳାଚଳ ଉପରେ ମଧ୍ୟ ପଡ଼ୁଥିବା  କୁହାଯାଇଛି।
ପଥଚାରୀଙ୍କ ସୁରକ୍ଷା ନେଇ ପ୍ରଶ୍ନ
ରାସ୍ତା କଡ଼ରେ ପର୍ଯ୍ୟାପ୍ତ ସ୍ଥାନ ନଥିବାରୁ କେତେକ ସମୟରେ ପଥଚାରୀମାନେ ଯାନବାହନ ଚଳାଚଳ କରୁଥିବା ଅଞ୍ଚଳ ନିକଟ ଦେଇ ଯିବାକୁ ବାଧ୍ୟ ହେଉଥିବା ଏଭଳି ପରିସ୍ଥିତି ଦୁର୍ଘଟଣା ଆଶଙ୍କା ବଢ଼ାଇପାରେ ବୋଲି ସ୍ଥାନୀୟ ମହଲରେ ଚିନ୍ତା ପ୍ରକାଶ ପାଇଛି।
ଭିଡ଼ ସମୟରେ ଆମ୍ବୁଲାନ୍ସ ଭଳି ଜରୁରୀକାଳୀନ ଯାନବାହନ ଦ୍ରୁତଗତିରେ ଯାତାୟାତ କରିବାରେ ବାଧା ସୃଷ୍ଟି ହେବାର ସମ୍ଭାବନା ନେଇ  ପ୍ରକାଶ କରାଯାଇଛି।
ଛାତ୍ରଛାତ୍ରୀ ଓ ଦୈନିକ ଯାତ୍ରୀ ହନ୍ତସନ୍ତ
ରାଜପଥ ଦେଇ ପ୍ରତିଦିନ ଯାତାୟାତ କରୁଥିବା ଲୋକଙ୍କ ସହ ସ୍କୁଲ ଛାତ୍ରଛାତ୍ରୀ, କର୍ମଚାରୀ ଓ ବ୍ୟବସାୟୀମାନେ ମଧ୍ୟ ଏହି ସମସ୍ୟାର ସମ୍ମୁଖୀନ ହେଉଥିବା ଦାବି କରାଯାଇଛି। ରାସ୍ତାରେ ଅନିୟନ୍ତ୍ରିତ ଅବରୋଧ ରହିଲେ ଆଗାମୀ ଦିନରେ ଯାତାୟାତ ବ୍ୟବସ୍ଥା ଆହୁରି ଚାପଗ୍ରସ୍ତ ହୋଇପାରେ ବୋଲି ସ୍ଥାନୀୟ ଲୋକେ ଆଶଙ୍କା କରିଛନ୍ତି।
ମିଳିତ ଉଚ୍ଛେଦ ଓ ସୀମା ନିର୍ଦ୍ଧାରଣ ଦାବି
ଏହି ପରିପ୍ରେକ୍ଷୀରେ ଜାତୀୟ ରାଜପଥର ଅଧିକାରଭୁକ୍ତ ଅଞ୍ଚଳକୁ ସରକାରୀ ଭାବେ ଚିହ୍ନଟ କରି ସୀମା ନିର୍ଦ୍ଧାରଣ କରିବା ସହ କଥିତ ଅନଧିକୃତ ନିର୍ମାଣ ଓ ଅବରୋଧ ହଟାଇବାକୁ ଦାବି ହୋଇଛି। ଏଥିପାଇଁ କଳାହାଣ୍ଡି ଜିଲ୍ଲା ପ୍ରଶାସନ, କେସିଙ୍ଗା ଏନ୍‌ଏସି ଓ ସ୍ଥାନୀୟ ପୁଲିସ ପ୍ରଶାସନର ମିଳିତ ଉଦ୍ୟମରେ ଯାଞ୍ଚ ଏବଂ ଆବଶ୍ୟକ ଆଇନଗତ ପଦକ୍ଷେପ ନେବାକୁ ଅନୁରୋଧ କରାଯାଇଛି।
ରାଜପଥର ସୀମା ସ୍ପଷ୍ଟ କରି ଯାତାୟାତ ପଥକୁ ଅବରୋଧମୁକ୍ତ କରାଗଲେ ଟ୍ରାଫିକ ବ୍ୟବସ୍ଥା ସୁଗମ ହେବା ସହ ପଥଚାରୀ ଓ ଯାନବାହନ ଚାଳକଙ୍କ ସୁରକ୍ଷା ବଢ଼ିପାରିବ ବୋଲି ଅଭିଯୋଗକାରୀ ଆଶା ପ୍ରକାଶ କରିଛନ୍ତି।